1Jo 2 | ASO | STEP | Izipaha'ne zuho mate, goloso nite' ma dikelizave losa luhuvo nite' mene nogize lingimuve. Ido' mali'mo lihime nite' ma daline' nene Metehida a'mine lihime'vemu' goni' ogavo leze hize ele' o-ledelive ve lisihe' Izesu' Kilisito' nene a'mida neive. Aza nene a'mine lihime ma dalive nene hize ele' o-deleseive.

1 John 2

O'moso'mo Lihime Lemelesa Neivo Hize Ele' O-ledaa' Ive Izesu' Neive Lo Gizine' Gamazi

1 Izipaha'ne zuho mate, goloso nite' ma dikelizave losa luhuvo nite' mene nogize lingimuve. Ido' mali'mo lihime nite' ma daline' nene Metehida a'mine lihime'vemu' goni' ogavo leze hize ele' o-ledelive ve lisihe' Izesu' Kilisito' nene a'mida neive. Aza nene a'mine lihime ma dalive nene hize ele' o-deleseive. 2 Asi've Izesu' gono do lihimete apase-lidine' ma ve. Ido' leli' lihimetevo' nomive. Evene' muki' misubou' misubou' mini'mi monaveti lihime'ine nesi apase-ngidine' ve. 3 Ido' eze nene ningo gele none lo gelaa' noune' nene lamine' nehe. Nado gelelone. Leli' monovote do ningosa gelelesune. Eze gamazi lo huko-lidine' nene gele do minaa' noolone' nene eze ningo gele none lo gelaa' noune' nene lamine' gelaa' noune lo gelelesune. 4 Ido' evene' lingelite eze ningo gele none li gamazi've gili disa'mani' nene ingine sozalo' ve minikevo gamazi gihile engita nomive. 5 Ido' evene' linge ma O'moso'mi gamazi gili di minani' nete ingine lu'ine imani' nene apa nite' nomive. Laminetokovo' imi gili' li imaa' nave. Ido' ingine O'mosola gi'mize none laa' ave nene Izesu' ogo molo minidi'mine igi inginesi a'mine'mine igi mili minilizani' o neive. Laza ne'mino ogo molo ogo mino ma ne'mo ezela gi'mize none lune' nene gamazi gihile ve lo gelelesune.

Lou' Gamazi Liteheli'mo Gosoho' Gidini Gilingumu' Gizine' Gamazi

7 Lu'ne lengeme nouvoni' mate, lou' gamazi gosoho' ma lo soto' ogo gize lengemamuve. Litehe lou' ado' gamene gozopo' aka'milati' gili minani' mamu' nogize-lingimuve. A'mine lou' gamazi litehe nene nado neve. Nene mono' gamazi li-lingimikevo gilaa' nani' nene neive. 8 Ne neiha mene luhuvo niteku' nogizuvo a'mine lou' nene gosoho' neine' gelave. Ee, mo lamineto' gosoho' neive. Izesu' aza a'mine lou' nene do gosoho' ogavo linginela gono gosoho' nodavo liti'muso izo minine' nene vovo' vovo' neivo labana' gihile nene mo api' ogo noilive. 9 Ne neiha evene' linge ma evene' mamu' mulu'ningu' goloso ogavo lukehe ngibili minisa laza labanaku' none li laa' nave nene ingine olihe labanaku' ami liti'musou' ha nizave. 10 Nizani'za evene' linge ma ingine evene' muki' lu'ine ngimi nasahili' i-ngidaa' ave nene lamine' labanaku' nizave. Ingine evene' ma ngele'mizi gopo amilisave. 11 Ido' ingine evene' mamu' mulu'ningu' goloso ogavo lukehe ngibilaa' nave nene liti'musou' ha nizave. A'mine ve nete liti'musoukovo' moni liti'musoli'mo ve'ine likavo vilizani' aka nene ningi gilamave.

12 Izipaha'ne zuho mate, Izesu'nimu' ve lo O'moso'mo lihimetine hulo-lengede neive.
Nemu' luhuvo nite' mene nogize-lingiduve.
13 Ido' me'ninge lingine O'moso'mo olihe api' ogo inite' mata' do soto' amivosa
a'mine gamenelo' aka'mila ha minive nene ningi gili nizave.
Nemu' luhuvo nite' mene nogize-lingiduve.
Ido' ve goso've lingine goloso meleho Satani mo ivile' igi nizave.
Nemu' luhuvo nite' mene nogize-lingiduve.
14 Izipekizo, lingine Metehine ningi gili nizave.
Nemu' luhuvo nite' mene gize-lingiduvoni' ve.
Ido' me'ninge lingine O'moso'mo olihe api' ogo inite' mata' do soto' amivosa
a'mine gamenelo' aka'mine ha minive nene ningi gili nizave.
Nemu' luhuvo nite' mene gize-lingiduvoni' ve.
Ido' ve goso've lingine amuzo mili minavo O'moso'mi gamazi nene lutingu' neivo
goloso meleho Satani mo ivile' igi nizave.
Nemu' luhuvo nite' mene gize-lingiduvoni' ve.

Laza Misubouko Niteto' Lute Molamoloningumu' Gizine' Gamazi

15 O'moso gelekele' o-damo misubouko minevo' dovo' oga' sunolo' nehe ido' me misubou' minine' inite' golosolo' nehe nene lutine milamilo. Evene' ma ingine lu'ine a'mido' milani' nete lu'ine nene Meteho O'moso imisa'mave. 16 Misubou' veti monovo danava muki' nene goloso nitekumu' lumo helaa' ido' inite' mata' ninge lamine' tamine' ogo mumuzo' oga' nehe ido' evene' ve'nido' heneni nganeni do soto' soto' ogo gonolise gonolise ogo okode lute do dize dize' oga' nehe ne'mine monovo nesi nene Metehidati' nomive. Misuboukotikovo' neive. 17 Ido' misubou' neve a'mingu' lumo helaa' ine' inite' mata' nesi nene osu' lo'mo novive. Noviha ingine O'moso'mi gamazi gili di minaa' nave nene vi osu' lami minivi' minivi' igivo' minilisave.

Kilisito'ni Lovo O Emaa' Ive Neine' Mamu' Gizine' Gamazi

18 Izipaha'ne zuho mate, gamene nene mo li'nibe ogave. Nemu' Kilisito'ni lovo o emaa' ive mo soto' oloseive li li nizani' nene mo gilikeve. Ido' gilado' nene lovo i imaa' ave muki' nene mo soto' ikeve. Nemu' nene gamene mo li'nibe ogave lo gele none. 19 A'mine ve nene lezesi maka' minuninguti' leze huli-lidi vani'za leze aleve gihile lili' igi minamave. Leze aleve gihile lili' igi minadini leze huli-lidi vamavo maka' minunidine. Ido' ingine huli-lidi vani' nemu' ingine muki' leli' zuho minamani' nene soto' ogavo gele none. 20 Emeni dameni've lamine' atoli'minesi minive ne'mo Sikalahu've lehize-lingidivo mini lingine muki' gamazi gihile nene mo gili nizave. 21 Luhuvo nite' mene gizuvoni' nene lingine gamazi gihile lamine' nene gilamave lo gizamuve. Gamazi gihile lamine' nene mo gili mini a'mine gamazi gihile laminekuti' nene soza gamazi ma soto' osa'mine' nesi nene gili nizave lo gizuvoni' ve. 22 Ido' sozalo' ve ve lo ne zamotinemu' lolone. Ingine Izesu'nimu' ataize li aza O'moso'mo do lu' izelive lo imiselelesa live minamive li laa' nave nene ingine sozalo' ve ve lolone. Me ve nete Melehingi gipelengi ataize li-ngidisa Kilisito'ni lovo i imaa' ave nizave. 23 Ingine gipelemu' ataize li-daa' nave nete Melehosi maka' bizi minamaa' nave. Ido' ingine gipele gili imaa' nave nete Melehosi maka' bizi minaa' nave. 24 Lingine gozopo' gamene aka'mila gana' gilani' gamazi nene gili di minilo. A'mine gana' gilani' gamazi nene gili di minilizani' nene Melehingi Gipelengi inginela gi'mize lamine' ilisave. 25 Ido' Izesu' aza inite' ma lehize-ledelove lo lo huko line' nene minevo' minevo' ogo minaa' lemeni dameni nene lehize-ledelove lo molo-lede neive.

26 Me gamaziu' nene lengi' lengele'mize gopo ilisa gili minaveti monovo lo soto' ogo gize lingimuvoni'za 27 lingine neve Kilisito' lehize-lingidine' Sikalahu've nene ha di mini'mi vi nizave. Di mini'mi vi nizanako evene' laza inite' matakumu' apize lengemelonido' nomive. A'mine Sikalahu've lehize-lingidine' ne'mo inite' matakumu' apize lengemaa' neive. Ido' gamazi lo-lengemaa' neine' nene sozasi nomive. Laminetokovo' lo-lengemaa' neine' nenako lido' nene gili di Kilisitoda gi'mizi minilo. 28 Ee, izipaha'ne zuho mate, Kilisito' ogo heteleline' gamene soto' ilingu' nene laza eze velelo' mino lovozo helepele' ogo lehelele izamivo minelone li ezela gi'mizi minilo. 29 O'moso aza nene ve lisihe' lamine' neive li lingine gili nizave. Gili nizanako evene' ingine monovo lisihe' lamine' igi mili minaa' navemu' nene O'mosolati' soto' ani' ve li gililisave.